Mizo National front
General Headquarters
Mizoram : Aizawl
Press Release
MIN DOTUTE HIAN AN DO AN HRE LO: MNF President
Belhchian dawl si lo, sorkar tuma Sorkar beihna hi thil tha lo tak a ni: -Dr. Thangtea
Vawiin April ni 17, 2023 Thawhtanni khan Mizo Hnam Run inkhawmah MNF President leh Chief Minister Pu Zoramthanga chuan party-ah mi thar 181 lawm lutin thu a sawi a. “Pathian leh kan ram tan titu kan ni,” tiin zam lo turin party mipuite a chah a. “Min dotute hian an do an hre lo. Thuthlung an do a ni zawk,” a ti.
MNF mipuite zam lo tura fuihin: “Zam suh u! Pu Laldenga te, Pu Zoramthanga te that vang a ni lo. Hruaitute hi chu kan la ral vek dawn. MNF din chhan leh auhla chu Pathian leh kan ram tan, tih a ni a. He hnam thuthlung meichher hi a ral lovang,” a ti.
Pu Zoramthanga chuan Mizote chu Pathian remruat dana India-a lut kan nih dan a sawi a. Burma zawm emaw, Pakistan, India, Crown colony zawm emaw, independence boruak karah political vacuum (hmun ruak) lo awm a. India ramah kan lo awm ta mai a ni, a ti.
Ram thuthlung sawiin: “China atanga kan pi leh pute lo chhuk kha he ramah hian an tawp chat a. Pathianin ram min pe. A dawtah Lal thuthlung – Chanchintha min pe a. Chutah Hnam thuthlung – kan inhung tlatna tur thisenin nationalism min pe a. He thuthlung hi Lalpan a champion tir dawn.”
“Vawiina min beitute hian an do an hre lo. Hmana thubuai hluite kha an thukphum lum leh a. Zoramthanga hi tichhe vek mah se, hnam thuthlung chu a ral lovang. An doa hi Pathian leh kan ram tan tih thuthlung vuan tlattu a ni. A mihringte hi fel tak kan ni lo, mah se ram leh hnam tana bei tlattu leh thuthlung vuan tlattu kan nihna hi kan felnaa pawm a ni.
“MNF an do lo, Zoramthanga an do lo. Pathianin Chanchintha hril hnathawk tura he hnam a buatsaihna thuthlung an do a ni zawk. India sorkar leh sipai general-te pawhin an do hneh loh thuthlung meichher hi do hneh chi a ni lo,” a ti.
Pu Zoramthanga chuan, kum 1966-a ram buai kha pumpelh theih ni mah se, Pathianin thisena baptist a duh. Under ground leh over ground bakah Zoram chhung leh pawna miten kan tuar vek. Hei hi hnam thuthlung tihnghehna a ni. Chanchintha hril tura min buatsaihna a ni. Party dangte chu kum enge maw hnuah an ral. MNF chu kum 62 a kal tawh a, a par vul zel a ni, a ti bawk.
Hnam Run chhung inkhawmah hian Minister Dr. R. Lalthangliana pawhin thu a sawi a. “Covid-in kum hnih min nuai a, a rapthlak hle. US-te meuh pawh a tuar nasa an ni. India rama minister rual meeting tam taka an sawi thin pakhat chu – Covid avangin hnaruak kan hnawh khat thei lo, an ti deuh vek. Central sorkar ngei pawhin he harsatna hi an tawk.”
Dr. Thangtea chuan: “Kan term chanve deuh thaw harsatnain min tlakbuak chungin health dept hnuaiah post 700 chuang la turin kan tifel hman a. Nunna chhan nana kan sum hman (budgeta awm lo) cheng nuai sing hnih a kai. Hma kan han la dawn chauh a, inthlanpui kan hmachhawn a lo hun leh ta mai hi a pawi hle.
“Heti chung hian kan sorkar hma khan, ZMC-ah khum 140 chauh a awm, tunah khum 480 a lo awm ta. District zawng zawngah oxygen plant kan dah vek a. Aizawl Civil Hospital ICU 5 chauh awm kha, tunah 30 dawn (naupang icu telin) kan nei tawh a. Covid laiin Pathianin min awmpui nasa hle. Kohhran, NGO leh party dangte nena kan thawhhona a tha hle.”
Dr. Thangtea chuan: “Kan sorkar hian kan hmaa mite thiltih kan chhunzawm thin. ZMC pawh kan hmaa miten an hawng a, tha takin kan chhunzawm. Covid dedicated medical college ni chungin MBBS pass thar 71% kan han neite hi thil ropui tak a ni. Zemabawk cancer superspeciality hospital (cheng nuai sing sarih) tur atana kan hmalakna pawh Centrala paltlang ngai zawng zawng kan tifel vek tawh a ni.”
“Healthcare pawisa Rs. vbc 70 vel kan ba pawh thla tharah hi chuan budget-a Rs. vbc 60 kan dah atangin engemaw zat bill kan release ka beisei. ADB project kan tifel a nih phei chuan healthcare bill tang a awm tawh lo ang,” a ti.
Politics chungchangah: “Party thenkhat chuan fel fai em emin, sarafim anga sorkarna din an tum a, hei hi a theih loh. Keini chuan kan fel loh ang angin mi rethei kilkhawr ber thlengin, zu leh drugs-in a tihbuaite pawh kan enkawl zel ang. Zai thiam chu nasa takin zai mai se. Chutiang bawkin inkhel thiam pawh. Vawi khat pawh minister la ni lo tan CM nih tum ngawt mai chi a ni lo.
“Social media politics hi a buaithlak khawp mai – Sorkar thiltih a chhe lai phochhuaka mipui ngaihdan tichiri zawnga thiltih hi tunhmain a awm ngai lo. Belhchian dawl si lova sorkar tuma sorkar beihna hi thil tha lo tak a ni. MNF pawh kan tlin lohnaah inngaidam tawn ila. Kei ngei pawh hi min ngaidam teh u. Ram mipuite pawhin in beisei kan phak lohnaah min ngaidam teh u,: Dr. Thangtea chuan a ti.
Vawiina mi thar 181 lawm luhte hi Aizawl East-I South Block (Zemabawk huam chhung)-a mite an ni a. Lawmluh aiawhin Pi K. Lalhmingliani (Ex-Councillor), Pu Zarzoliana leh Pu Lalringliana-ten thu an sawi bawk a ni.
Hnam Run chhung inkhawm hi Pu K. Lalthawmmawia, NCC-in a kaihruai a. Pu Vanlawma Chhangte, NCM-in hunserh a hmang bawk.
Inkhawmah hian Minister, MP, MLA leh party hruaitu thahnem tak an tel a ni.
Sd/-
(MALSAWMPUIA RALTE)
Jt. Secretary
Media & Publicity Department
Mizo National Front
Memo No. MNF/Media 04/2023/660
Dt. 17.04.2023