Mizo National front
General Headquarters
Mizoram : Aizawl
Press Release
LUNGLEI MIPUITE KAN NGAIHTHAH DAWN LO : MNF President
Vawiin ni 10.04.2023 Thawhtanni khan Mizo Hnam Run inkhawmah MNF President leh Chief Minister Pu Zoramthanga chuan Aizawl East-I bial atangin voter 213 a lawmlutin thu a sawi a. Lunglei Municipal Council inthlan chungchangah, “Lunglei mipuite duhthlanna kan hria a, kan ngaihthah lo ang,” a ti.
Pu Zoramthanga chuan Lunglei Municipal Council inthlan chungchang leh MNF tlak fai vek avanga rilru a hrehawm thu a sawi a. “Lungleiah Sorkarin kan tihtur kan tih loh te, tih loh tur kan tihte avangin pawi kan ti a, an hriatthiamna kan dil a ni,” a ti.
“MNF chu pa chan chang kan ni a, kan faten lungawi lohna an lantir hi, a elsen zawngin kan kal ngai lo. Min kaiharhtuah hmangin, a aia tha zawkin hma kan la zawk thin. Serchhip bialah pawh bial dangte thik khawpin kan duhsak hlauh thung a ni,” a ti.
Pu Zoramthanga chuan LMC inthlana kan tlakna leh party mite vuinaah insiamthat kan tum, a ti a. Lungleiah Covid leh RTPCR (a hmaa kan la hriat ngai loh) issue leh Lunglei bypass road atan Congress sorkar khan cheng vbc 10 vel an dah kha – bypass siam turin cheng vbc za tel a ngai si. Khawpui kawng siam nan kan hmang ta zawk a ni, a ti.
“Lungleia kan tlakna hi inensan a hnekin kan ngaihsak sauh dawn a. Theihtawpa Serchhip kan en zui angin, Lungleiah pawh kan ti zawk dawn. ‘MNF nge nge hnam thinlung putu’ an tih theih nan,” a ti a. “He kan tlakchhiatna hi min kaiharhtu a ni ang. Serchhipah kan experience tawh a. Tuirial by election-ah a rahchhuah kan hmu tawh a ni. MNF chu hnam neitu kan ni a, theitawpin hma ka la zel ang.
“Naktuk – naktip atangin ral relin hma kan la nghal dawn,” a ti a. “Pathianin kum 60 chuang MNF min kaihhruai tawhnaah kan lo muthlu a nih pawhin tunah hian min kai tho a, hma lam panin kan hlawhtling ang.”
MNF President Pu Zoramthanga chuan: “Kan ram hi Pathianin ram thuthlung hmanga a kaihhruai a ni a. Pu Laldenga kha lehkha thiam vang leh talent ropui a neih avanga thlan a ni lo. A thuthlung keng turin Pu Laldenga leh MNF hi a thlang mai a ni. Kan that bik vang a ni lo. Mizote hi Chanchintha thehdarh tur leh hnam thuthlung humhalh tlat turin min duh a. Pathian leh kan ram tan tih hi kan kalsan tur a ni lo,” tiin party mipuite a chah a ni.
Chief Minister chuan finance chungchangah sum harsatna a sawi bawk a. India sorkar atangin tun dinhmun thlengin Rs vbc 3,000 vel kan hmuh tur kan hmu lo a. Hei hi hmu ila chuan harsatna tam tak hi kan sukiang ang, tiin, sorkar term thara insiamthat hman a beisei thu a sawi bawk.
Nationalist sorkar danglamna sawiin, “Burma raltlan lo lutte chu India sorkarin um let vek turin rawn ti mah se, keini chuan, ‘Kan unaute an ni a, kan hum tlat dawn,’ tiin prime minister hnenah pawh raltlante enkawlna thawh turin (a hnuah a rawn thawh ve nghe nghe) kan ti ngam. Hetiang hian tu state mahin an ti ve ngam lo,” Pu Zoramthanga chuan a ti.
Chhung inkhawm hi MNF Treasurer Pu K. Vanalauva’n a kaihruai a. Rev. B. Vanlalduha’n hunserh a hmang a. Party-a lawmluh thar mi 213-te aiawhin Pu Lalrinchhana leh Pu K. Rochhunga-ten thu an sawi bawk.
He hunah hian Minister, MLA leh AMC Corporator engemaw zat bakah party hruaitu thahnem tak an tel a ni.
Sd/-
(MALSAWMPUIA RALTE)
Jt. Secretary
Media & Publicity Department
Mizo National Front
Memo No. MNF/Media/04/2023/652
Dt. 10.04.2023