Mizo National Front
General Headquarters
Mizoram : Aizawl

Press Release

MNF aia hnathawk tha thei tur an awm lo -Lalmalsawma Zasai MADC

Vawiin April ni 3, 2023 (Thawhtanni) hian Mizo Hnam Run chhung inkhawm neih a ni a. Hun hnihnaah Pu Lalmalsawma Zasai, member, Mara Autonomous District Council chuan thu sawiin, “MNF aia hnathawk ṭha thei tur dang an awmlo. Thli dang dangin min chhem thin mah se, kan innghahna lungphum, Pathian leh kan ram tan tih hi a nghing lo anga, Abrahama Pathian, Isaka Pathian, Jakoba Pathian chu a ngai reng a. Pathian hming kan lam chhung chuan kan lamah Pathian a ṭang reng ang,” a ti.

Pu Malsawma chuan, Palak leh Siaha bialah MNF kan chhe ngailo a, kan hlim hle. Chhimtawp lamah ZPM thawm kan hre ve lo a, MLA nei turin mipuiten kan beisei lo, bul an ṭan ve dawn chauh zawk a ni. ZPM hian Pathian hming lam ve ṭhin mah se, an mi zawn chu Suria mi bawk an ni leh ṭhin. An pu berin opposition nih a peih tawhloh thu a lo sawilawk tawh angin, party zuihral tur hnaivai ber chu ZPM hi an ni a. Kum 2023 inthlanpuiah an chaklo anih chuan an ral mai a rinawm. Bial sawm pawh la tlinglo tan sorkarna siam a harsa ṭhin hle a ni. Ram pum huapa sorkar leh turin tumahin Congress party hi an beisei lova, ZPM beih hi an tihtheih awmchhun leh an tana ṭha ber tur a ni rih mai. BJP te khawpuiah engmah an nilo a, MLA fund hmang chauha bial hmasawna thawk tura beisei an nih avangin mipuiah an tlana tak tak theilo bawk a ni, a ti. Chuvangin, ṭampui mithi ah leh hun harsa ah Pathianin rorel turin MNF a ruat ṭhin a ni, a ti.

Mipuiin hruaitu ṭha kan zawng ṭhin a, chumi kan zawnna kawngah chuan, Aesop-a thawnthu pakhat ang deuhin, arbo kan zawnna lamah mi kuta sahrang hmu lianin tuiah kan pilbo ve mai ang tih a hlauhawm hle. Chuvangin, kan hriat ang hi thil nihna dik a ni kherlo fo ṭhin a. Thawm tilian tute hi a takah an lian kherlo. Assembly session-a an chettlat dan ropuilo tak opposition te hi thlannawn an chakawm loh hle a ni. Sorkar hmalakna chhuanawm leh rotling tak tak te leh hmachhawp ropui tak tak te avang hian MNF hi a sorkar leh ngei a rinawm a ni, a ti bawk.

Mizo Hnam Run chhung inkhawm hi Pu Ramzauva, Adviser, MNF Gen. Hqrs. chuan kaihruaiin, Pu Rothanga, EM, Mizo National Senior Front Gen. Hqrs chuan hunserh a hmang a. Pu HP Zonunsanga, Secretary, MNF Gen. Hqrs. hnen aṭangin CM leh Dy. CM te zin leh hmasawnna thiltih hrang hrang report ngaihthlak a ni bawk.

Sd/-(PETER CHHANGTE)

Jt. Secretary
Media & Publicity Department
Mizo National Front
Memo No.MNF/Media/04/2023/645
Dt.3.04.2023