Mizo National Front
General Headquarters
Mizoram : Aizawl
Press Release
MNF KAN SAWRKAR LEH NGEI DAWN -Zoramthanga, MNF President
Vawiin March ni 28, 2023 (Thawhlehni) hian Kolasib MNF Block Conference chu Diakkawn YMA Hall-ah ropui taka hman a ni a. He hunah hian Pu Zoramthanga, President MNF chuan thu sawiin,” Kan khingpui ber thin Congress chu tlachhiain, an tlinna tur bial a vang hle a. ZPM lah chuan inthlan hmasaka an vote khawn khawmna no leh thleng te kha an hmang thei ta lo va, an auhla te kha hman tlaklohah an chhuah zo tawh a. Chuvangin, inthlanpui lo awm leh turah MNF kan sorkar leh ngei dawn tih hi rinhlelh rualloh a ni,” a ti.
Pu Zoramthanga chuan, MNF sorkar hmasaah Mautam hmachhawnin. Tun sorkarah pawh hripui lo lengin, harsatna dang tam takin min tlakbuak leh bawk a. Chutih mek laiin chhungkaw thahnem tak SEDP hmanga tuamhlawm niin sem chhunzawm zel tur a ni bawk. Heng harsatna kara rorel tur hian Pathianin MNF hi aruat thin a ni. Assam nena ramri buai kan neiah pawh sipai pakhat pawh hloh loin kan in withdraw lo a. Withdraw tura min ngenna pawh, withdraw tur chuan CM atanga ka chawlh hmasak a tul thu ka sawi avangin nawr chi ah min ngai ta lova. Raltlan nawrkir tura central in nasa taka min nawrna pawh pawisa loin, MNF sorkar chuan House-ah kan tuamhlawm tur thu puangin kan humhim a ni, a ti.
MNF President chuan, inthlanpui lo awm turah Congress party chu beih tham pawh niloin, an tlinna tur a vang hle a, an arte lukawn mai a hlauhawm hial a ni. ZPM lah chuan inthlan hmasaka an intih itawmna, Congress leh MNF nilo an tih thin te, unit system tihbo an tihte leh movement kan ni, an tihte kha a diklohzia kan hmu ta vek a. Itawm thei ang bera an inzuar chung pawhin seat 10 pawh an la tling zo lo a ni. Kalphung thar an tih pawh vawi tamtak an thlak leh tawh a. Ram development aupui tur an neilo a, an hruaitute buai avangin beih pawh ngailoa buaisa an ni. Bial tinah thuhnih neiin candidate pahnih pathum an tiam zung mai a, sorkar lai hnathawh that chinpawr leh sawichhiat bak thiam an neilo a ni, a ti.
Lunglei Municipal Council inthlan turah pawh Pathian leh mipuite zarah sorkarna kan siam ngei a rinawm a. Rorellai party kan nih angin, theihtawp chhuaha kan beihna azarah LMC hringtu leh dintu MNF chu sorkarna Pathian leh mipuiin min pek ngei ka beisei a ni, a ti bawk.
He huna thusawitu dang bialtu MLA, Minister nibawk Pu K. Lalrinliana chuan, “Kum 2018 inthlan dawna kohhran mipui tawngtaina chu Pathianin chhangin rorel turin MNF chu a dah a. Harsatna leh buaina namenlo; hripui leng, ran hrileng, lirnghing, kan chhehvel rambuai avanga raltlan mi engemaw zat lo lut te kan hmachhawn a. Heng harsatna lo thleng tur hmulawktu Pathianin kan tawngtai chhanna atan MNF min pe a ni, ” a ti. Pathianin kan Chief Minister finna leh remhriatna a pe a. Kohhran leh tlawmngai pawl te nena tang tlangin heng harsatna te hi state dangte entawn tlak khawpa thain kan hmachhawn thei a ni. Kan fin leh fel bik vang niloin, Pathian min hruaina avang leh kan hruaitute finna a pek vang a ni, a ti.
Pu Rintea chuan, sawichhiatna nasa tak karah pawh, MNF chuan Diamond Jubilee a thleng thei hial a. Hetiang thleng thei hi party dang an awm ve lo a. Party thenkhat chuan kum hnihkhat lekah an party hming an thlak zung zung a. Pathian leh kan ram tan tih thupuia neitute kan nih avangin kan danglam bik a, party mipuite pawhin hruaitute lakah rinna an nghat ngam thin a, hruaitu inthlak zengzung kan ni velo a ni, a ti bawk.
He hunah hian MNF President, Pu Zoramthanga chuan party hrang hrang leh neutral atangin, voters 662 lai MNF party ah a lawmlut a. Lawm luhte atangin, MNF party an zawm chhan hrang hrang; MNF sorkar hnathawh thatzia leh sorkar lehzel tura a rintlakzia te an sawi bawk a ni.
Kolasib MNF Block Conference hi Pu Lalzawmmawia, Block President chuan a kaihruai a. Rev H. Zathuama, Diakkawn bialtu Pastor chuan hunserh hmangin, MNF Gen. Hqrs hruaitu mi engemaw zatin he hun hi an hmanpui bawk a ni.
Sd/-
(PETER CHHANGTE)
Jt. Secretary
Media & Publicity Department
Mizo National Front
Memo No.MNF/Media/04/2023/638
Dt.28.03.2023