Mizo National Front
General Headquarters
Mizoram : Aizawl
Press Release
COVID AWM LO ANG MAIA SOCIAL MEDIA-AH THU PHUAHCHAWPIN SORKAR MIN BEI THIN HI A MAK :-Dr.R.Lalthangliana, Minister
ASSAM RIFLES HO MOTOR LIANA INSAWN CHHUAK MUP MUP HI PATHIAN HRUAINA : – Dr.Vanlaltanpuia, MLA
Dr.R.Lalthangliana, MNF Adviser leh Health Minister ni bawk chuan vawiin March ni 24th, 2023 (Zirtawpni) hian Lunglei Municipal Council inthlan turah ward hrang hrang fangin campaign office-ah thu a sawi. Vawiin chawhnu hian Lunglei MIZOFED kawt, Venglaiah MNYF Sub-Headquarters Lunglei huaihawtin street campaign neihah thu a sawi leh bawk.
Dr.R.Lalthangliana chuan MNF sorkar term hmasaah khan India ram khawpui dangte chu state sorkar sum tel lova an hmasawn nasatzia an thlir a. Mizoram khawpui tan rualawh thlak a tihzia thu sawiin, kha tih laia Chief Minister zahawm tak Pu Zoramthanga hnenah a thlen thu a sawi. Chief Minister leh a thawhpuite chuan state sorkar sum ni lo, central atanga khawpui tihhmasawnna tur sum tam tak lokal thei tur chu tha an tih hlawm hle avangin, UD & PA department hi MNF-in a din ta a ni, a ti. Chu chuan municipal a kalpui ta nghal a. Chumi kal zelah kum 2010-ah AMC inthlangin Congress leh a thawpuite an sorkar a, Congress sorkar kha a sual vang ni kher lovin, a ngaihna hriat loh vang leh a dintu an nih loh avangin municipal kalpui dan an hre lo a, musical chair ang maiin an kalpui a. Thuneihna at chilh luat avangin AMC kha a kal tluang thei lo. A hnu Congress sorkar vanglai takin kum 2015-ah AMC kan inthlang leh a, a malin MNF kan sorkar ta a ni tiin, tunah MNF kut chhuak leh bultan LMC hi, a kalpui dan tur dik hre sa thlap, MNF official candidate-te chu Lunglei khawpui hmasawn nan lo vote tling ngei turin a sawm.
Health Minister chuan covid lai khan MNF ni lo, party dang sorkar ta se, kan ram dinhmun hi a ngaihtuahawm khawpa a rin thu a sawi a. “Mihring pulh hri mai ni lo, vawk pulh hri a leng a, ramri a buai a. Tu sorkar lai maha an tawrh ve ngai loh khaw chhak lam unau duh takte politics buai avangin lo khual chhawn a ngai a. Hriat lawk miah lohah cheng vaibelchhe tam tak sen ral a ni a. Khawvelah mihring nuai hlir nuai 66 dawnin nunna an chan a. Khawvel sorkar lian ber leh thil ti thei ber pawh an mangang hle a nih kha. Kei pawh hi Covid lai khan Health Minister ka nih angin engmah ka la thawk hman lo a, damdawiin tha kan sa hman lo a, damdawi tha kan lei hman hek lo. Tunah kan thawk ve dawn chauh a. Mahse, Mizoram chu task force hrang hrang, sorkar hnathawk, kohhran, sorkar leh mimal tin kan tangrual a. Pathianin he sorkar hi mal a sawm a ni. Hun harsa kan tawrh chhung khan kan worker leh mipui tan duh angin engmah kan la thawk thei lo. Kan duhthusam tam tak hi Lalpa’n zahngaihna a lantir ang a, sorkar tharah hripuite awm tawh lovin mipui tan theihtawp kan chhuah thei tawh ang,” a ti. Khang hun harsa a MNF ministry-in a tawrhna zozaite hre duh tawh lova, covid awm lo ang maia social media-ah thu phuahchawp nen sorkar an bei chiam chiam thin chu mak a tih thu a sawi bawk.
Dr.Vanlaltanpuia MLA pawhin, “Lunglei khawpui kawngpui thatna turin theihtawpin Assembly House-ah Lunglei lam MNF MLA-te kan au nasa thin hle a, kei pawh ka au nasa thei hle. ATL (Aizawl-Thenzawl-Lunglei) road hi Session neih a piangin nasa takin ka au chhuak thin. MNF chu Pathian programme-a kal kan nih avangin a hun takah Pathianin min chhanchhuak zel thin a nih hi. Covid hrileng karah SASCI hmangin nasa takin kan thawk mek ta a ni. Vawiina thil thleng Aizawl Khawpui chhung atanga Assam Rifles ho Motor liana insawn chhuak mup mup hmuhte hi Pathian hruaina a ni a tih loh theih loh. Pu Zoramthanga hi Pathian bel ruat, leadership nei tha a niin, a ropuina hi nitinin ka hmuh belh zel thin. Pu Tawnluia pawh Zoram tan Pathian bel ruat anih avangin natna khirh tak natna atangin Pathian chhanchhuahin a awm a, ram tan nasa takin ke a pen mek a. MNF chuan thuneihna sem zai tha kan tih angin LMC pawh a taka inthlang turin kan kal pui leh ta rup mai a, kan tum ber Lunglei hmasawnna turin MNF official candidate i vote vek ang u,” a ti bawk.
Sd/-(R.LALHMANGAIHA)
Secretary
Media & Publicity Dept.
Mizo National Front
Memo No.MNF/Media/04/2023/631
Dt.24.03.2023.