LEADER THA HNUAI LO AH CHUAN DINHMUN A SAWHNGHEH THEIH LOH -PU TJ.Lalnuntluanga, Minister

Mizo National Front
General Headquarters
Mizoram : Aizawl

Press Release

LEADER THA HNUAI LO AH CHUAN DINHMUN A SAWHNGHEH THEIH LOH
-PU TJ.Lalnuntluanga, Minister

Vawiin November ni 25, 2022 (Zirtawpni) hian Mizo Hnam Run ah chhung inkhawm neih a ni a. Hun hnihnaah Pu TJ Lalnuntluanga, EF & CC.etc. minister leh MNF Adviser ni bawk chuan thu a sawi.

EF&CC Minister Pu Manuna chuan, Union Environment, Forest & Climate Change Minister Pu Bhupender Yadav leh Director-General of Forests & Special Secretary (DGF&SS) Pu C.P. Goyal, IFS te chu a hmuh thu asawi a, Sawrkar laipui hotute chu forest clearance kalpui leh hmalak dan kalhmang tifel hma tur te, Forest Research Centre for Bamboo and Rattan (FRCBR) Bethlehem Vengthlang, Aizawl chu Recruitment Exam Centre-a hlangkai tur leh tun aia dinhmun sang leh tha zawka dah tur te, Forest Department kaltlanga kuthnathawktute puih an nih theihna tur leh, Agro Forestry lama hma an sawn theih nana Green India Mission (GIM) District tina kalpui tura hmalak sak tur te, ramsa leh sava tawlhruk man te dahna tur Animal Rescue Centre emaw, Mini Zoo din tura hmalak sak tur te, Forest Department hnuaiah Centrally Sponsored Scheme (CSS) atanga Forest Protection Squad din sak tur te, District hrang hranga Nagar Van Project kalpui tur atana dilna leh rawtna siam thehluh tawh pawm sak tur te, State Environment Impact Assessment Authority (SEIAA) leh State Expert Appraisal Committee (SEAC) dinna tur bakah Chairman leh Member dang tur rawtna thlente pawm sak tur tein a ngen a.

Minister thu thlente chu Union Forest Minister Pu Bhupender Yadav chuan a ngaihpawimawh thu leh tihhlawhtlin ngei a tum tur thuin a chhang a. Director-General of Forests & Special Secretary pawhin Minister thu thlente chu bawhzuia hma an lo lak nghal tur thu a sawi bawk a ni.

Pu Manuna chuan, ram siam tha tur chuan Leader tha a ngai a, Leader tha hnuai lo ah chuan dinhmun asawh ngheh theih loh a, leader tha nei lo chu a tawp ah an tluchhe leh nge nge thin a ni, chuvangin MNF party pawh hi Leader tha hnuaia ah kan kal a kan ram pawn nasa tak in hma a sawn zel a, Ram hi Lalpa ta a nih angin Pathianin min hruai zel a, kan hmalakna te mal min sawm a, chak takin kan thlen chinah kan hmalaknate pawh kan ti hlawhtling zel dawn a ni, a ti.

MNF Adviser chuan, Social Media khawvelah kan cheng a, mitin mai hian Internet kan khawih a, Party thenkhat ten kan hmalak tawhna mipui hriat turin thu dik leh dik lo pawh hrelo in an ral rin thuin, a chhe lam pang hawi zawngin an duh lai lai an thehdarh kual a, mipui te pawn thudik a ni em tih hi kan hriatfiah a kan finfiah hmasak a ṭul thu a sawi a. Chanchinbu mite pawn kan ram siamṭhatna tur anih chuan mipuite hriat turin hmalakna ṭha te kan hrilh hriat hi a pawimawh em em a ni, a ti.

Ram hi Lalpa ta a ni a, Pathian tel lo chuan engmah hian hmasawnna tak tak a awm lo a, Pathian rinchhan chungin Pathian leh kan ram tan tih thuthlung vuantute kan nih angin Pathian in min hruai zel a, a lama rilru dik tak kan put chuan Pathian leh mipui zarah kan sorkar leh ngei dawn a ni, a ti bawk.

Mizo Hnam Run chhung Inkhawm hi Pu R. Vanlalsawma, Adviser MNF Gen.Hqrs chuan kaihruaiin, Pu T. Thanzauva Adviser MNF Gen Hqrs -in hunserh ahmang a, Pu Lalhuthanga Gen. Secretary, MNYF Hqrs hnen atangin zin report ngaihthlak a ni bawk.

Sd/-
(LALTHAKIMA)
Jt. Secretary
Media & Publicity Department
Mizo National Front
Memo No.MNF/Media/03/2022/563
Dt. 25.11.2022

Leave a Reply

Your email address will not be published. Required fields are marked *