Mizo National Front
General Headquarters
Mizoaram : Aizawl

Press Release

 

AIZAWL WEST-II MNF BLOCK CONFERENCE

Ziakin ramri chin kan lo la thlen ngai lo a, Political talk a la awm ngai lo: Pu Lalruatkima, Aizawl W-II MLA

Vawiin ni 23.11.2022 khan Aizawl West Jt YMA Multipurpose Centre, Vaivakawnah Aizawl West-II MNF Block Conference neih a ni a. Khuallian Pu Lalruatkima, MNF Adviser leh MoS chuan mi thar 239 a lawmlut a. He hunah hian Aizawl West-II bial chhunga Hnam Pasaltha rammu 172-te hnenah thilpek hlan an ni bawk.

Khuallian Pu Lalruatkima, Minister of State leh Bialtu MLA chuan thusawiin, MNF Sorkara
Covid hripui leh harsatna tam tak karah bial chhunga inkalpawhna kawngpuite tihpuitlin chhoh a nih thu te, lungrem leh side drain tam tak siam a nih bakah Dintharah multi-level parking, a chunga futsal ground awm tur, Rs nuai 1200 senga sak tur te, Tuikual North futsal ground thara grass phah tur leh Tuikual South-a volleyball court siam turte bakah hna dang tam tak thawh a ni, a ti a. “Kan hnathawhte chu a tha, a tlo leh a mawi tur a ni. Hlep tam hi kan inenlna tur a ni lo a, hnathawh thatah kan inel tur a ni. Hei hi MNF kan danglamna tur a ni,” a ti

Sorkar hmasa huna zu zawrh, sikul tan hma, zirtirtu indaih lohna leh thil dang dangah harsatna a awm tiin, MNF Sorkar chuan hmasawnna hna a thawk a. Zirna hi hmasawnna bulthut a nih angin zirtirtu tam tak lak belh an ni, a ti a. Kawngpui chhia siam that a ni a, ni tin mamawhte pawh kan hnianghnar. Heng zawng zawng hi kohhran hote tawngtai chhuah sorkar kan ni a. Pathian leh kan ram tan titu party kan ni, a ti.

Pu Lalruatkima chuan MNF Sorkarah Covid-19, raltlan, lirnghing bakah ramri-ah Assam police battalion ralthuam famkim nen an lo lut a, kan police hmun an luah a. Pathianin Israel-te a hruai angin, he sorkar hi Pathianin a hruai tlat a. Tlai dar 4-ah chuan kan sipaiten an hmun an luah leh vek thei a ni, a ti a. “Khawchhak unaute pawhin ei tur kan neih chhung chu chaw in nghei bik lo ang, an tihte kha hnam inpumkhatna tizualtu a ni a. Ramri buai lai kha fur hunlai a ni chungin thla li tla tur buhfai kan lo chhek khawl a ni,” a ti.

Hnam inpumkhatna tura MNF sorkar hmalakna sawiin, Zo Kutpui huaihawt a ni a, Tripura-ah bus tlantir a ni a. Langtlang sorkar din nan online RTI tihpuitlin a ni a, Lok Ayukta mumal tak din a ni a. Power decentralisation kan ti a – Sinlung Hills an inthlang tawh a. Lunglei Municipal Council kan din mek a. Lunglei MZU Southern Campus pawh tihhlawhtlin mek a ni, a ti.

Pu Ruatkima chuan tunhnaiah Assam nen ramri chungchang inbiakna an neih thu a sawi a, Assam lam chuan ramri chungchang ziakin in la rawn thlen ngai lo. State pahnih karah political talk pawh a la awm ngai lo an tih thu a sawi a. “Keini lamin Bengal Eastern Frontier Regulation 1875 kan tan chhan a, anni’n an pawm lo thung. Amaherawhchu, census nei tur leh inbiak chhunzawm turin kan inthlah a ni,” a ti a. Assam nen kan ramri chingfel turin Pu Zoramthanga kaihhruai sorkar a that ber tiin, “Pu Zoramthanga hi inremna palai atan symbol a ni a, India sorkar pawhin a mamawh tak zet a ni. Vision thui tak neiin hma a la a. Thei nia inngai chuan kan ti hram zel a, thei lo nia inngaite chuan hmalak ngaihna an hre lo. Kan pu hi opposition ten nuih ṭhin mah se, a kaihhruai sorkarah chuan Union budget-ah Bamboo link road leh Bypass road tur a lo chhuak thei a ni. Hetiang hi a la awm ngai lo,” a ti.

Conference hmanpuitu MNF Treasurer Pu K. Vanlalauva pawhin thu a sawi a – Hnam sipaite inpekna thukzia leh tun dinhmun thlenga MNF-in hma a sawn zel thu te, lungrual taka thawkho zel turin kalkawmte a sawm a ni. Khual zahawm Pu R. Thanglura, Dy Mayor pawhin AMC hmalakna pawimawh bakah bial mipuite thawhhona a that thu a sawi.

Aizawl West-II MNF Block Conference-ah hian bial chhunga party mipui 1400 chuang an tel a. He hunah hian hnam martar leh member boralte sunna hun an nei a. Hnam pasalthate chawimawina hun an hmang a. Bial chhung mite tan Puanṭhui khawl 90 semchhuah a ni bawk a ni.

Block Conference program hi Block President Pu C. Lalrohawnga’n a kaihruai a. Upa Dr. PC Biaksiama’n hunserh a hmang a, Block Secretary Pu Johny H. Ralte hnen atangin report ngaihthlak a ni a. Block Treasurer Pu Lalchawimawia’n Resolution pharhin pass a ni a. Pu PB Bawichhunga, NCM-in lawmthu sawina a nei bawk a ni.

Sd/-
(MALSAWMPUIA RALTE)
Joint Secretary
Media & Publicity Department
Mizo National Front
Memo No.MNF/Media/03/2022/562
Dt.23.11.2022