Mizo National Front
General Headquarters
Mizoram : Aizawl

Press Release

THIL DANG TAM TAKAH INDIA RAMAH MIZOTE KAN HMING THAT HLE LAIIN; HIV/AIDS TAMNA LEH CANCER HLUARNA RAM KAN NI HI KAN INENFIAH A NGAI – DR. R. LALTHANGLIANA, HEALTH MINISTER

Nimin ni 2, 2022 (Nilai zan) khan ‘MSACS- Rimawi Khawvel Music Award 2022 dawngtute lawmman semna’ chu Vanapa Hall-ah neih a ni a. He huna khuallian Dr.R.Lalthangliana, Health Minister chuan, kum 22 kal ta, kum 2000 kum khan he lai programme-ah hian khuallianah ka lo awm tawh tihte ka hre chhuak a, tunah hetiang hun hlu tak kan hmang leh thei hi lawmawm ka ti hle a ni. India ramah hian Covid do chungchangah leh thil tam takah kan hmingthat hle laiin; a mi cheng tam dana chhutin HIV/AIDS tamna ber leh Cancer hluarna ram kan ni hi a pawi hle a, kan inenfiaha tan kan lak a ngai takzet a ni. Covid-in kiam lam a pan zel a, karleh lawk hian CYMA-te nen AIDS dona kawngah hun lian tham tak siam kan tum a. Khawvel ram changkang taka kan ngaihteah pawh AIDS hi a lo hluar hle a, Health Minister ka nih hlim khan, India rama AIDS dona hmun pui ber pawh ka zu tlawh tawh a, hetiang lama Mizote kan ziaawm theihna turin USA-a, Texas thlengin ka zu kal a, thil awm dan ka zu zir chiang ve a ni, a ti.

Dr.R.Lalthangliana chuan, “Mizote hi zai leh rimawiah kan duai lo hle a, zanina kan hun hman hian Mizote hi rimawi khawvelah min tiphur thar leh se ka duh hle a ni. Music a ni emaw, zai lam a ni emaw, sports-ah pawh nise, Mizote hi kan daih reilo thin hle a, a pawi takzet a ni. Zai lamah Pi Siampuii Sailo, Pi Lalsangzuali Sailo leh midangte pawh daih rei tak an awm a, an nunah khan thangthar zaithiamte hian entawn tur kan nei tam hle a ni. Tun lai zaithiam chhuak thar then khat, kum hnih thum, kum linga lek daih ho, kum lama la naupang tak tak, chuai leh mai thinte an tam a, a pawi khawp mai. Zanin atang chuan kan thangthar zaithiam talent tha tak tak nei ho hi daih rei hram hram tum u la, zuk leh hmuan, ruih theih thilah fihlim hram hram ang che u. Midangte tan entawn tlak nih tum u la, tun laia Mizo Idol, Mizo Icon-te hi ka chah duh che u chu, in talent-te hian daih rei se, mi dangte tan in nunah inzirna tur entawn tlak awm rawh se,” a ti.

Organising Committee Chairman Pu PC. Lalthakima pawhin a hmingin founder president niin kum 2000 atang khan bul kan tan tawh a. Thangkhat lian zet kan kal a, music-ah kan inrawlhna kha a rei tawh hle a. Khatih lai khan print media-te electonics media-in min run lai a ni a, kan chawl det a, tunah kan thar thawh leh ta a, mahse, hun a kal zel ang a, he award hi dawn chak awm berte zingah kan siam chho zel ang. Kan khuallian hian music indusrty lamah hma min lakpui nasa a, a chungah kan lawm hle a ni, a ti bawk.

He hunah hian zaithiam Award hrang hrang 15 zet an sem a ni. Female Gospel Singer of the year-ah Lalrinhlui Tlumang, Male Singer of the year-ah Zorema Chhangte, Band of the year-ah The Profet, Choir of the year-ah Thuampui Branch YMA, Lenglawng/Lengzem of the year-ah H.Lalrempuia, new artist of the year-ah Tv.Guru Gee, artist of the year-ah Sawmtea, Music composer of the year-ah Kima Chhangte, Music of the year-ah Michelle Varte, Song writer of the year-ah K.Hminga, Special Award for life time-ah Pu Ngurthangvelate thlan an ni.

Health Minister hi Ist North East Geology & Mining Ministers Conference Nagaland-a nghah chu khuallian nia a hman zawh hnu, a lo haw rualin nimin tlai khan Rangvamuala Gospel Camping neih mekna chu tlawh nghalin, a hmun hmate a en pui a, medical duty-te pawh tlawhin tul leh mamawh an neihte chu a theih ang anga tanpui a, a hnen thlen turin a hrilh nghal bawk a ni.

Sd/-(R.LALHMANGAIHA)
Secretary
Media & Publicity Dept.
Mizo National Front
Memo No.MNF/Media/03/2022/544
Dt.03.11.2022