Mizo National Front
General Headquarters
Mizoram : Aizawl

Press Release

HEALTH MINISTER -IN PHC, SUB-CENTRE-TE TLAWHIN HEALTH CLINIC CENTRE A HAWNG A ,  GAS CONNECTION NEILOTE HNENAH FREE CONNECTION A PE NGHAL.

Vawiin October ni 26, 2022 (Nilaini) hian Darzo tlang Liandala Runah ‘Mizo Zirlai Pawl Assembly Vawi 66-na lawmna’ hun hnihnaah Dr.R.Lalthangliana, Higher & Technical Education Minister chuan khuallian niin a hmanpui a. Dr.R.Lalthangliana chuan, “Darzo tlang hi British hun laia kulh an lo dinna, mi hmingthang tam tak lo chhuahna khuaah MZP Assembly kan thleng hi lawmawm ka ti takzet a ni, kan District tharah hian National leh International level-ah sports-ah mi hmingthang tam tak lo chhuahna a ni bawk. MZP thupui ‘Zirlaite- Zofate leh Zoram tan’ tih hian Zofate hmasawnna turin engkim mai hi a huam a. Mizo Nationalism chawinungtu in ni a. MZP President-in a sawi ang khan, kan ram a chhiat a thatah MZP hian mawh a phur a ni. Zirlaite hi  thenkhat chu kan background a hniam mai thei, kan background hniam avanga beidawn loh tur, background hniam tak atang hian dinhmun sangah kan ding thei vek tih hria ang u. Zofate hian tun atanga tan kan lak loh chuan nakinah hnam dang hian kan sorkar hna sang sang hi min thawhsak ang tih a hlauhawm a, tan i la sauh sauh ang u.  MZP-ten kuthnathawh uar leh chawisan tih hi, a tlukpui thu Bible-ah a awm a, taimakna leh tumruhna nen zirlaiten tan la sauh sauh ang che u. Kan nakin hun hi a chhiat a thatah zirlaiten mawh in phur a, kan ram hma hun hi in kutah a awm a ni,” a ti.

MZP Assembly hi ni 25th atanga ni 27th, October, 2022 hian hman mek a ni. vawiin hian Pu R.Lalremsanga, DC Hnahthial chu uaptu a ni a. Pu Andrew F.Lalramnghaka, Vice President MZP chuan a kaihruai a, Pu Jakob Lalmuanpuia, General Secretary chuan report hrang hrang pein, Pu Lalnunmawia Pautu MZP President pawhin thu a sawi bawk a ni.

Hemi hnu hian Health & Family Welfare Minister Dr.R.Lalthanglianahian Tuipui ‘D’ Sub-Centre, Darzo Health & Welness, South Vanlaiphai PHC, New Kawnpui khua, Lungpuitlang khua leh Muallianpui Sub-Centre-te a tlawh a. India ram hmun danga awm ve lo, MNF SEDP Health Clinic Centre hi Mizoramah 235 zet kan din a, nakkum hi chuan anih tur anga kalpui vek kan tum a ni. Clinic Centre-ah hian Health worker dah vekin a puitu SEDP atanga rawih helper kan dah vek dawn, a ti a. A building sak dan tur leh a kentel tur hrang hrangte a sawi bawk.

South Vanlaiphaiah hian X-ray khawl dah thar chu a hawng nghal a. New Kawnpui leh Lungpuitlangah hian Health Clinic Centre thar a hawng nghal bawk a ni. Heng a tlawhna hmunahte hian medical equipment leh damdawi hrang hrangte a sem nghal a, khawtlang hruaitute nen inkawmhona an nei nghal zel bawk a, a tlawhna khuaah kum lama upa, kum 70 chin tan puan nuam (Ludhiana) chhuak a sem nghal zel bawk a ni. Hei bakah hian a bial tlawhnaahte hian Hnahthial Gas Indane atangin Gas connection la neilote a pe zel a, a tahtawla la pek kim vek a tum a ni.

Heng Health Department a tlawhnaahte hian Health Minister hi Pu Lalneihthanga Colney, Hnahthial BDO, Dr.Lalrengpuii Ralte, Chief Medical Officer Incharge, District Hospital Hnahthial, Dr. Nunsangzela Khuptawng, Programe officer Jhpiego, Ex- Quality Consultant  MHSSP leh Dr.Lalramchhana Medical Officer, S.Vanlaiphai-ten an tawiawm a ni.

Vawiin chaw hnu hian Dr.R.Lalthangliana MNF Adviser hian Tuipui D-ah voter 15 zette chu MNF-ah a lawmlut nghal bawk a ni.

 

Sd/-
(R.LALHMANGAIHA)
Secretary
Media & Publicity Dept.
Mizo National Front
Memo No.MNF/Media/03/2022/540
Dt.26.10. 2022