PATHIAN HIAN MALSAWMNA MIN PEK DAWN CHUAN RETHEIH LEH THAWHRIM HMASAK A NGAI – DR.R.LALTHANGLIANA, H & TE MINISTER

Mizo National Front
General Headquarters
Mizoram : Aizawl

 

Press Release

 

PATHIAN HIAN MALSAWMNA MIN PEK DAWN CHUAN RETHEIH LEH THAWHRIM HMASAK A NGAI – DR.R.LALTHANGLIANA, H & TE MINISTER

Vawiin October ni 25, 2022, (Thawhlehni) hian Students’ Self Support Union (SSU) General Headquarters chuan G & SA Hall, Electric veng Hnahthialah ‘General Assembly vawi 35-na leh Vangpui Kut’ an hmang a, he hun hi nimin atanga hman tan tawh a ni.

Khuallian Dr.R.Lalthangliana, Minister, H & TE, etc. chuan thusawiin, SSU ‘thupui kuthnathawh chawisan tih leh zirna atana mahni intodelh’ tih hi kei pawhin ka experience nei tawhna leh ka thupui ngaihsan thin ber a ni a, ka thusawi chakna berah thu ka sawi thei hi ka lawm hle a ni. In hnena thu ka sawi dawn tih ka hriat hian¬† Thufingte bung 10: 4 ‘Kut dawngdah chuan retheihna a thlen a, taimakna kut chuan hausakna a thlen thin’ tih leh Bible chang dang dang a lolang a. Kan lehkha ve zir hun lai khan pheikhawk pum pawh kan nei pha lo a, sleeper kan bun a, hna hi kan thawk nasa em em thin a ni. Kei pawh High School ka kal laiin Lo ka nei a, chhipin ka phur zo vek thin. Veng mawng chho lutuk atangin zing karah vawi 10 chuang tui ka kawt a, Gas a la awm loh avangin thal chhungin kum khat daih thing ka pu khawm thin a, Bati engah zan reh tak tak thlengin lehkha kan zir thin a, Zotlang Lungleiah hetiang hian lehkha zir pahin hun ka hmang thin a. Ka ngaihtuah leta ka inchhir reng reng lo, Pathian hian malsawmna min pek dawn chuan retheih leh thawhrim hmasak a ngai a ni, a ti.

Dr.R.Lalthangliana chuan, “SSU-te hian in motto ang hian ‘kuthnathawh chawisan leh zirna atana mahni intodelh’ tih hi vawng zel ang che u. Kei pawh hian M.phil leh PHd pawh hi a zir hun chhung zawh an tih hmain ka zo hman a, ka zir hun lai khan ni khatah darkar 3 aia tam ka mu lo hrim hrim a ni.Tumruhna, dikna, rinawmna leh taimakna hi a pawimawh ber a, theih loh hi khawvelah a awmlo tih hriat tur a ni. Vawiin hun hian rah tha chhuah se, kan hma hun turah kan ram chhiat leh that innghahna chu nangmahni ho hi in ni a, Mizo Nationalism vawng nung reng turin ka chah nghal bawk che u a ni,” a ti.

He hunah hian Pi T.Lalmuanpuii, Chairman MC.Apex Bank Ltd. chu khualzahawm a ni.

Vangpui Kutah hian Hnahthial DC Pu R.Lalremsanga chu kut Pa a ni a, Holy Heart School Principal Pi Lalbiakzami chu Kut Nu niin, Pu Lalhmachhuana Zofa, Diktawn Editor chu Resource Person a ni.

He hun hi TV. Johan Lalremruata, Vice President, SSU GHQ chuan a kaihruai a, Rev. V.Lalzarliana BCM, Hnahthial Bazar bialtu chuan hunserh a hmang a. TV. PC. Lalawmpuia, SG, SSU, GHQ chuan inhmelhriattirna leh report hrang hrang a pe a. TV. Lalawmpuia President leh Vice President SSU GHQ pawhin thu an sawi a. Nl.Lalrinngheti, Fin.Secretary, SSU GHQ chuan lawmthu sawiin hun a khar.

Sd/-
(R.LALHMANGAIHA)
Secretary,
Media & Publicity Dept.
Mizo National Front
Memo No MNF/Media/03/2022/539

Leave a Reply

Your email address will not be published. Required fields are marked *